ბავშვთა ნეიროგანვითარება

არსებობს თუ არა ჩვილ ბავშვთა განვითარების ნორმები? ბავშვთა ნეიროგანვითარებასთან დაკავშირებულ საკითხებზე „ამბიონს“ ნეიროგანვითარების ცენტრის ბავშვთა ნევროლოგი სოფო ტატიშვილი ესაუბრა:

„არსებობს ბავშვის განვითარების ასაკობრივი ნორმები შესაბამისი განვითარების სფეროების მიხედვით (მოტორული: ნატიფი და მსხვილი მოტორიკა, მენტალური, ადაპტური, სოციალური და სოციალურ-კომუნიკაციური სფეროები). ასევე, არსებობს ბავშვის განვითარების შეფასების სკრინინგული ტესტები ასაკობრივი ნორმების მიხედვით 2 თვიდან – 18 წლამდე – ასაკისა და ეტაპების სკრინინგული ტესტი (ASQ, ASQ:SE).“

ბავშვის ნეიროგანვითარებაზე რა ახდენს გავლენას?

ბავშვის ნეიროგანვითარებაზე უმთავრესად მოქმედებს ჩასახვის, მუცლადყოფნის პერიოდში განვითარებული ინფექცია, ინტოქსიკაცია, გენეტიკური ფაქტორები, მშობიარობის ტრავმა, ასფიქსია, დღენეკლულობა.

უმთავრესად რა სახის ნევროლოგიური განვითარების პრობლემები იჩენს თავს?

ძირითადად გვხვდება ცერებრული დამბლის, ეპილეფსიის, გონებრივი განვითარების შეფერხებისა და ქცევის დარღვევათა შემთხვევები.

მიზანშეწონილია თუ არა მედიკამენტების გამოყენება ნეიროგანვითარების შეფერხების შემთხვევაში?

მედიკამენტური მკურნალობა მიზანშეწონილია მხოლოდ ეპილეფიისა და მძიმე ქცევითი დარღვევების დროს, სხვა შემთხვევაში – არაეფექტურია და მოწოდებულია მხოლოდ ადრეული ინტერვენცია და სარეაბილიტაციო მკურნალობა.

რამდენად მნიშვნელოვანია ნევროლოგთან კონსულტაცია?

განვითარების შეფერხების დროული ამოცნობა და ადრეულ ინტერვენციის პროგრამაში ჩართვა მნიშვნელოვნად აუმჯობესებს გამოსავალს.

ექიმის რჩევა:

მშობლებს ვურჩევთ დააკვირდნენ ბავშვის განვითარებას, შეაფასონ მათი ასაკობრივი ნორმები, რომელიც წარმოდგენილია საიტზე: www. child.ge, რაიმე დარღვევის აღმოჩენის შემთხვევაში დროულად მიმართონ ნეიროგანვითარების ცენტრს.

თეონა ნოზაძე