მთავარი » სხვადასხვა

“ხიხვი”

სტატიის ავტორი: | თარიღი: 01.08.2012 ერთი კომენტარი | 4,004 ნახვა

“ჭაჭაზე დაყენებული ღვინო სრულყოფილად წარმოაჩენს ხიხვის მდიდარ არომატსა და გემოს…”

“ხიხვი” მცირედ გავრცელებული ვაზის ჯიშია. იძლევა მაღალი ხარისხის სუფრის მშრალ ღვინოსა და სადესერტო-ლიქიორულ ღვინოს. გასული საუკუნის 60-70-იან წლებში “ხიხვი”-ს ყურძნისაგან ამზადებდნენ სადესერტო-ლიქიორული ტიპის მაღალხარისხოვან ღვინოს კარდანახში “ხიხვი”-ს სახელწოდებით. ხიხვი რამდენად დიდია ინტერესი დღეს “ხიხვის” ღვინის მიმართ, რა ტექნოლოგიით მზადდება და რომელ კერძებს ეხამება? ამ თემის შესახებ “ამბიონს” ტექნიკის მეცნიერებათა დოქტორი, მევენახეობისა და მეღვინეობის საერთაშორისო აკადემიის ნამდვილი წევრი, ალავერდის მონასტრის მარნისკონსულტანტ-ენოლოგი თეიმურაზ ღლონტი ესაუბრა:

” “ხიხვი” ადგილობრივი (ალაზნის კერის), მცირედ გავრცელებული სტანდარტული ვაზის ჯიშია. ახმეტის რაიონში ცნობილი იყო “ჯანანურის” სახელწოდებითაც (რომელიც მიღებული აქვს ახმეტის რაიონის სოფელ ჯანაანიდან), ხოლო გურჯაანისა და სიღნაღის რაიონებში ეს ჯიში ატარებს “ხიხვის” სახელს.

“ხიხვის” ვენახის ფართობები ძლიერ შეამცირა სოკოვანი დაავადებებისა და ფილოქსერის შემოჭრა-გავრცელებამ საქართველოში. “ხიხვი”-ს ვაზი მგრძნობიარეა ნაცრის მიმართ, რამაც შესაძლოა შეუშალა ხელი ამ ჯიშის აღდგენა-გავრცელებას. კეცხოველის, რამიშვილისა და ტაბიძის მონაცემებით, “ხიხვი”-ს ვაზის ჯიში სოკოვანი დაავადებებისა და ფილოქსერის გამოჩენამდე უხვმოსავლიანი იყო. დღეს კი იგი საშუალო, ან საშუალოზე დაბალმოსავლიან ჯიშად ითვლება. “ხიხვი” იძლევა მაღალი ხარისხის სუფრის მშრალსა და სადესერტო-ლიქიორულ ღვინოს (ახმეტის, თელავის, გურჯაანის რაიონებში).

დღეს “ხიხვი”-ს ღვინოს ამზადებს “ქინძმარაულის მარანი” ე.წ. ევროპული წესით, ანუ უჭაჭოდ. გასული საუკუნის 60-70-იან წლებში “ხიხვი”-ს ყურძნისაგან ამზადებდნენ სადესერტო-ლიქიორული ტიპის მაღალხარისხოვან ღვინოს კარდანახში “ხიხვი”-ს სახელწოდებით. ღვინის საბჭოური საწარმოები ხიხვისაგან სუფრის მშრალ ღვინოს არ აყენებდნენ, შესაძლოა ამ ჯიშის ვენახების სიმცირის გამო.

ხიხვი დღეს საკმაოდაა გაზრდილი ინტერესი “ხიხვი”-ს ღვინის წარმოებისადმი. ცალკეული ფორმები და მცირე საწარმოები აშენებენ “ხიხვი”-ს ვენახებს და იმედია, უახლოეს ხანში “ხიხვი”-ს ღვინის წარმოება აღმოსავლეთ საქართველოს სხვადასხვა რეგიონში გაიზრდება.

აღსანიშნავია, რომ “ხიხვი”-ს ქვევრის მაღალხარისხოვანი კახური ღვინო ტრადიციული ტექნოლოგიით დაყენებული იყო ალავერდის მონასტრის მარანში 2011 წლის სეზონზე.

ნებისმიერი ღვინის მსგავსად, “ხიხვი”-ს ღვინის შედგენილობა, არომატი და გემოც დამოკიდებულია ღვინის დაყენების ტექნოლოგიურ წესზე.

“ხიხვი”-ს ღვინო გამოირჩევა არომატულობით, განსაკუთრებით ზოგიერთ მიკროზონაში (კარდანახი, ჭიკაანი, იყალთო და სხვ.) თუ უჭაჭოდ დაყენებული “ხიხვი”-ს ღვინის არომატს აყალიბებს ყურძნის რბილობისა კანის აქროლადი, არომატწარმომქმნელი ნაერთები (უმაღლესი სპირტები, ცხიმოვანი მჟავები, რთული ეთერები), ჭაჭაზე დაყენებული ღვინო მდიდრდება კანის, კლერტისა და წიპწის არომატწარმომქმნელი ნაერთებითა და სხვადასხვა ჯგუფის ფენოლური ნაერთებით, ამინომჟავებით, მინერალური ნივთიერებებით, რაც სრულყოფილად წარმოაჩენს ხიხვის მდიდარ არომატსა და გემოს.

“ხიხვი”-საგან დაყენებული სუფრის მშრალი, ქვევრის კახური ღვინო ისევე უხდება მოხარშულ და შემწვარ ხორცეულს, ცხიმიან და ცხარე კერძებს, თევზეულს, სხვადასხვა სახის ყველს, სალათეულს, როგორც კახეთის სხვა ვაზის ჯიშებისაგან დაყენებული ღვინოები.

“ხიხვი”-ს ღვინო შეიძლება სხვადასხვა ტექნოლოგიით დავაყენოთ. არჩევანი ჩვენზეა. “ხიხვი”-საგან შეიძლება მივიღოთ უჭაჭოდ (ანუ ე.წ. ევროპული წესით) და ჭაჭაზე, ანუ ტრადიციული ქართული ტექნოლოგიით დაყენებული, აგრეთვე, ბუნებრივად ნახევრადტკბილი და სადესერტო-ლიქიორული ტიპის მაღალხარისხოვანი ღვინოები. გასული საუკუნის 50-60-იან წლებში “ხიხვი”-ს ვაზის ჯიში წარმატებით იყო კულტივირებული მესხეთში. ცნობილი წრიოხის მეურნეობის ზვრებიდან მოწეული ყურძნისაგან ხარისხოვანი ღვინო დგებოდა. ამავე პერიოდში “ხიხვი”-ს ყურძნისაგან უმაღლესი ხარისხის სადესერტო-ლიქიორული ტიპის ღვინოს ამზადებდნენ კარდანახში. 2003-2007 წლებში ასპირანტ გაგა ბუიშვილთან ერთად ჩვენ დავაყენეთ ევროპული ტიპის, ბუნებრივად ნახევრადტკბილი და კახური ტიპის მაღალხარისხოვანი ღვინოები და გამოვიკვლიეთ მათი ქიმიური, ფიზიკურ-ქიმიური და ორგანოლეპტიკური მახასიათებლები.

ღვინოების ჯიშური მახასიათებლების შენარჩუნების მიზნით, ხანგრძლივი დროის მანძილზე, სასურველია ღვინოების დაყენება ბუნებრივ საფუვრებზე ღვინის დაყენების ტრადიციული (ყურძნის ტკბილის სრულ ჭაჭაზე დადუღებითა და დავარგებით 5-6 თვის განმავლობაში) ტექნოლოგიების გამოყენებით”.

ქეთი ჭელიძე


სტატიაზე ვრცელდება "ამბიონის" საავტორო უფლებები


კომენტარების შინაარსზე პასუხს არ აგებს "ამბიონის" რედაქცია. გთხოვთ, უცენზურო და კანონის საწინააღმდეგო შინაარსის შემცველი კომენტარების დაწერისგან თავი შეიკავოთ.

1 კომენტარი »

კომენტარის დატოვება

დაწერეთ თქვენი კომენტარი. თქვენ შეგიძლიათ გამოიწეროთ ეს კომენტარები RSS არხის საშუალებით

გთხოვთ იყოთ თემასთან ახლოს, სპამ კომენტარები დაიბლოკება სისტემის მიერ.

შეგიძლიათ გამოიყენოთ შემდეგი ტეგები:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong> 

კომენტირებისას შეგიძლიათ გამოიყენოთ თქვენი Gravatar-ი