“სანამ გვაქვს დრო სინანულისა, მოვინანიოთ მთელი გულით”
წმ. მღვდელმოწამე კლიმენტი რომაელი
“თიხა ვართ ხელოვანის ხელში. როგორც მეთუნე, როდესაც ჭურჭელს ქმნის და თავის ხელებში ამრუდებს მას ან ზელს და კვლავ ჭურჭლად ჩამოქნის, თუკი იჩქარებს ცეცხლის ღუმელში მის მოთავსებას, ვეღარ უშველის მას, ასევე ჩვენც, სანამ ვართ ამ წუთისოფელში, ხორციელნი, სანამ გვაქვს დრო სინანულისა, მოვინანიოთ მთელი გულით, რაც უკეთური ჩაგვიდენია, რათა გადავრჩეთ უფლის მიერ, ვინაიდან ამ სამყაროდან ჩვენი წასვლის შემდეგ იქ ვეღარ შევძლებთ აღსარების თქმას ან, მით უფრო, მონანიებას.
ამგვარად, ძმებო, აღვასრულოთ მამის ნება და წმინდად დავიცვათ ხორცი, დავიცვათ უფლის მცნებები და მივიღოთ საუკუნო ცხოვრება. რამეთუ ამბობს უფალი სახარებაში: “თუკი მცირეს არ დაიცავთ, ვინ მოგცემთ თქვენ დიდს? გეუბნებით თქვენ, რომ ყველაზე მცირეში სარწმუნო დიდშიც სარწმუნოა”(შდრ. მათე, 25.21; ლუკა, 16. 10-11). შესაბამისად, ამას ამბობს: “დაიცავით სხეული უბიწოდ და ბეჭედი შეუბღალავად (შდრ. 2 კორ. 1.21-22; ეფეს. 1.13, 4.30), რათა მოგვენიჭოს მარადიული ცხოვრება.”
(II ეპისტოლე კორინთელთა მიმართ, თავი VIII. თარგმნა ვიქტორია ჯუღელმა).
სტატიაზე ვრცელდება "ამბიონის" საავტორო უფლებები
კომენტარების შინაარსზე პასუხს არ აგებს "ამბიონის" რედაქცია. გთხოვთ, უცენზურო და კანონის საწინააღმდეგო შინაარსის შემცველი კომენტარების დაწერისგან თავი შეიკავოთ.