საკვირაო ქადაგება (08.01.2017)
8 იანვარს სრულიად საქართველოს კათოლიკოს-პატრიარქმა უწმინდესმა და უნეტარესმა ილია მეორემ წირვის შემდეგ მრევლს ქადაგებით მიმართა და ქრისტეშობის დღესასწაული მიულოცა.
“ყველას გილოცავთ ქრისტეშობის დღესასწაულს. ქრისტეშობის მეორე დღეს ეწოდება „კრება ყოვლადწმინდისა ღვთისმშობლისა“. ღვთისმშობლის ნათესავების დღესასწაულია – წინასწარმეტყველისა დავით მეფისა, იოსებ დამწინდველისა, უფლისა ძმისა იაკობისა… ჩვენ შევთხოვთ მათ, რომ მათი ლოცვით, ვედრებითა და მეოხებით მშვიდობა მოგვცეს უფალმა თავისი დიდი წყალობით”,- ბრძანა უწმინდესმა.
პატრიარქმა დავით მეფის შესახებაც ისაუბრა.
“დღეს განსაკუთრებით ვდღესასწაულობთ დავით მეფის ხსენებას, ალბათ გახსოვთ მისი უკვდავი ფსალმუნი: „მიწყალე მე ღმერთო დიდითა წყალობითა შენითა“ და მრავალი სხვა. წმინდა დავით წინასწარმეტყველი ღვთისაგან არჩეული იყო მეფედ. იყო ცხვრის მწყემსი იყო და ღმერთმა დაადგინა მეფედ ისრაელისა.
არის მისი მოკლე ლოცვა: „მოიხსენე უფალო დავით და ყოველი სიმშვიდე მისი“, ერთად ვთქვათ სამჯერ, რომ სიმშვიდემ დაისადგუროს საქართველოში…
სიმშვიდე და სიხარული არ მოგაკლოთ მამა ზეციერმა თქვენ და საქართველოს”,- აღნიშნა პატრიარქმა.
ილია მეორემ ბულგარეთის ეკლესიის მიტროპოლიტი ნიკოლოზის სტუმრობის გამო სიხარული გამოთქვა.
“ჩვენ ბედნიერნი ვართ და სასიხარულოა, რომ ჩვენთან წირვას ესწრებოდა . იგი არის პლოვდივის მიტროპოლიტი, ეს ეპარქია სიდიდით მეორეა დედაქალაქის შემდეგ. ჩვენ გულითადად მივესალმებით მას და მოხარულნი ვართ, რომ დღეს ჩვენთან იყო”,- დასძინა კათოლიკოს-პატრიარქმა.
სტატიაზე ვრცელდება "ამბიონის" საავტორო უფლებები
კომენტარების შინაარსზე პასუხს არ აგებს "ამბიონის" რედაქცია. გთხოვთ, უცენზურო და კანონის საწინააღმდეგო შინაარსის შემცველი კომენტარების დაწერისგან თავი შეიკავოთ.