20 აპრილს სასტუმრო “ქორთიარდ მარიოტში”, ელექტრონული მოწმობების ალტერნატივის მოთხოვნასთან დაკავშირებით იურისტებთან და არასამთავრობო ორგანიზაციების წარმომადგენლებთან სასულიერო პირთა და მართლმადიდებელ მოქალაქეთა კრებულის შეხვედრა გაიმართა.

შეხვედრაზე განიხილეს 30 000 ხელმომწერთა დღემდე დაუკმაყოფილებელი მოთხოვნა პირადობის მოწმობების ალტერნატიული გზით აღებასთან დაკავშირებით. შეხვედრის მონაწილეები მიიჩნევენ, რომ მოქალაქის პირადი ინფორმაციის ელექტრონულ ჩიპში განთავსება პიროვნების რელიგიურ შეხედულებებს ეწინააღმდეგება და მოქალაქეობრივ უფლებებს ზღუდავს.

მღვდელი მალხაზ ყიფიანი (წმ. დემეტრე თავდადებულის სახელობის ეკლესიის წინამძღვარი): “ადამიანში ღვთისაგან ჩადებულია არჩევანის თავისუფლება. დღეს კი ამ უფლებას გვართმევენ და მორწმუნე ადამიანები შეზღუდულნი, გარიყულნი არიან. ირღვევა მათი პიროვნული უფლებები. იმედი გვაქვს, ახალი ხელისუფლების პირობებში ჩვენი მოთხოვნები დაკმაყოფილდება და პირადობის მოწმობების ალტერნატიულ საშუალებებს დაუშვებენ”.

სპარტაკ ბუკვანი (ადამიანის უფლებების დაცვის საერთაშორისო ორგანიზაციის პრეზიდენტი): “ჩვენი მოთხოვნაა, არ დაირღვეს ადამიანის უფლებები და პირადობის მოწმობის ალტერნატივის საშუალება იყოს. ადამიანმა საკუთარი არჩევანის მიხედვით უნდა აიღოს პირადობის მოწმობა. დღეს კი ამ მიმართულებით ადამიანთა უფლებები ირღვევა”.

დიმიტრი ლორთქიფანიძე (პარტია “თავისუფალი საქართველოს” წევრი): “ID ბარათების ფასი განისაზღვრა 30 ლარის ოდენობით, რაც ბევრი მოქალაქისთვის ხელმიუწვდომელი გახდა. შეგახსენებთ ტრაგედიას, რომელიც უკავშირდება აჭარაში 1 წლის გოგიტა აბაშიძის გარდაცვალებას, კავშირშია მისი მშობლების მიერ ელექტრონული აიდი ბარათებისადმი ხელმიუწვდომლობასთან. მათ ვერ შეძლეს, რომ გადაეხადათ 60 ლარი და აეღოთ ეს ბარათები. ეს არის ერთი თვალსაზრისი, რომელიც არ არის დაკავშირებული ძალიან მნიშვნელოვან თემასთან, რომელიც, თავის მხრივ, უკავშირდება რწმენის თავისუფლებას.”

კახა კუკავა (პარტია “თავისუფალი საქართველოს” ხელმძღვანელი): “ცალსახად, ჩვენი მხარდაჭერა გამოცხადებულია ინიციატივისადმი, რომელიც გულისხმობს, რომ ალტერნატიული პირადობის მოწმობები დაუშვან, რომელშიც არ იქნება იმ ინფორმაციის შემცველობა, რაც არის ელექტრონულ პირადობის მოწმობებში. წინააღმდეგობა ელექტრონული მოწმობებისადმი რამდენიმე ფუნდამენტური უფლებიდან გამომდინარეობს.

პირველი, ეს არის რწმენის თავისუფლება. თუკი მოქალაქეთა საკმაოდ დიდი ჯგუფი ამბობს, რომ ის ეწინააღმდება მათ რელიგურ წარმოდგენებს, სახელმწიფომ აუცილებლად უნდა გაითვალისწინოს. ვიცით რელიგიური ჯგუფები, რომლებიც უარს ამბობენ სამხედრო სამსახურზე და მათთვის ალტერნატიული სამხედრო სამსახური დაშვებულია და მით უმეტეს, დღეს ჩვენ ვსაუბრობთ არა რელიგიურ უმცირესობებზე, არამედ ამ ქვეყნის ყველაზე დიდ რელიგიურ საზოგადოებაზე, მართლმადიდებლებზე. მეორე არგუმენტი, რის გამოც მხარს ვუჭერთ ალტერნატიული პირადობის მოწმობების შემოღებას, ეს არის ადამიანის უფლებები, ვინაიდან პირადობის მოწმობაში უნდა იყოს დადასტურებული ადამიანის სახელი და გვარი, ხოლო ეს ბარათი შეიცავს დამატებით ინფორმაციებს. აიდი ბართის აღება უნდა გახდეს ნებაყოფლობითი. ძალიან სამწუხაროა, რომ ხელისუფლების არაერთი ზეპირსიტყვიერი განცხადების მიუხედავად, დღემდე ამ კანონპროექტს პარლამენტში მსვლელობა არ მიეცა.”

ზაზა ნანობაშვილი (მართლმადიდებელთა კრებულის თავმჯდომარე): “ჩვენ გვსურს, დღის წესრიგში საჩქაროდ დადგეს აიდი ბარათის ალტერნატიული ბარათების შემოღება. სინოდის ნათქვამი საკმარისი უნდა ყოფილიყო მთავრობისთვის. 30 000 ხელმოწერა მეტყველებს იმაზე, რომ ცოტანი არ ვართ და კიდევ შეიძლება მისი გავრცობა. ის, რომ წინა ხელისუფლების პირობებში აიდი ბარათზე სახელისა და გვარის გარდა მეტი ინფორმაციის შეტანას აპირებდნენ და დღეს მხოლოდ სახელი და გვარი რჩება, ეს შეურაცხმყოფელია. გამოდის, რომ ჩვენ იმდენი არ გვესმის, რას ვითხოვთ… აქ საუბარია კონტროლის მექანიზმზე, ჩიპზე, რომლითაც ხდება ტოტალური კონტროლი”.

დეკანოზი დავით დათუაშვილი (წმიდათა მთავარანგელოზთა ტაძრის წინამღარი): “გამოცხადებაში წერია: როცა მოვა ჟამი მეორედ მოსვლისა, ადამიანებს ექნებათ ანტიქრისტეს ბეჭედი, რომლის გარეშეც ვერ შეძლებენ ვერაფრის ყიდვა-გაყიდვას. მსოფლიო პრაქტიკა გვიჩვენებს, რომ ადვილად შესაძლებელია ჩიპზე მონაცემთა ბაზის შეცვლა. არის რეალური საშიშროება, რომ მომზადდეს ანტიქრისტეს ბეჭედი, რომელზეც იოანეს გამოცხადებაშია საუბარი. გვაქვს იმედი, რომ სახელმწიფო გაითვალისწინებს მართლმადიდებელთა მოთხოვნებს, რომელსაც სხვა რელიგიის წარმომადგენლებიც ემხრობიან და დაუშვებენ ალტერნატიულ საბუთს, რომელიც ამ კუთხით დაცული იქნება.”

ღონისძიების მონაწილეები იუსტიციის სამინისტროსა და პარლამენტს ელექტრონული პირადობის მოწმობების ალტერნატიული საშუალების შემოღებას დაჩქარებული წესით სთხოვენ.

თეონა ნოზაძე

ფოტო დავით დანელია

[nggallery id=127]