გლდანის რაიონში, V და VI მიკრორაიონებს შორის არსებულ ტერიტორიაზე წმიდათა მთავარანგელოზთა სახელობის ეკლესიის მშენებლობა მიმდინარეობს. უწმიდესისა და უნეტარესის ილია II-ის ლოცვა-კურთხევით, ტაძრის საძირკველი 2006 წელს იკურთხა.

ტაძრის მშენებლობას სათავეში უდგას დეკანოზი დავითი (დათუაშვილი), რომელიც საკუთარ მრევლთან ერთად თავდაუზოგავად შრომობს. მნიშვნელოვანია რომ ტაძარი ღვთის შეწევნით, მხოლოდ მრევლის მიერ გაღებული შემოწირულობების იმედად შენდება.

უფალმა ღირსყო მორწმუნე მრევლი… ტაძარზე ჯვარი აღიმართა…

როგორც დეკანოზმა დავითმა აღნიშნა, წმიდათა მთავარანგელოზთა სახელობის ეკლესიაზე ჯვრის აღმართვა, უფლის შეწევნით, იერუსალიმში პატიოსანი ცხოველსმყოფელი ჯვარის აღმართებას, მის სასწაულებრივ გამოჩინების დღეს თავისთავად დაემთხვა.

ჯვარი გამაძლიერებელია ქრისტიანისა, დამცველია ყოველი ბოროტებისაგან…

“უძლეველო, ახოვანო, საღვთოო, ძლიერებაო პატიოსნისა და ცხოველსმყოფელისა ჯვარისაო, გარე შემიცევ და დამიფარე ცოდვილი ესე” და – “ჯვარო – მფარველო სოფლისაო, ჯვარო – მშვენიერებაო ეკლესიისაო, ჯვარო – სიმტკიცეო მეფეთაო, ჯვარო – შემწეო მორწმუნეთაო, ჯვარო – დიდებაო ანგელოზთაო და შემმსუვრელო ეშმაკთაო”. აი, ასეთი სიტყვებით შეამკო მორწმუნე ერმა ჯვარი პატიოსანი. მაგრამ მე ვფიქრობ, რომ არ არის მსოფლიოში ქვეყანა, სადაც ასე ნათლად ყოფილიყო გამოვლინებული ძალა ჯვრისა, როგორც საქართველოში!” – უწმიდესი და უნეტარესი სრულიად საქართველოს კათოლიკოს-პატრიარქი ილია II (ჯვრის მონასტერი, 30 მაისი, 2007 წელი).

წმიდათა მთავარანგელოზთა სახელობის ეკლესიასთან იფუნქციონირებს საეკლესიო ხელოვნების სკოლა. კულტურულ-საგანმანათლებლო ცენტრში ახალგაზრდები სულიერებას აიმაღლებენ და თან კონკრეტულ პროფესიას დაეუფლებიან.

გახსოვდეთ, ნებისმიერი სახის თანადგომა და დახმარება მნიშვნელოვანია. თითოეული ადამიანი, ვინც მიიღებს მონაწილეობას ამ დიდ საქმეში, აღასრულებს ყველაზე დიდ საღვთო სწავლებას ქველმოქმედების შესახებ.

ა/ა GE97 TB11 3143 6080 1000 02

ნინო ჩალაძე

[nggallery id=9]