2 აგვისტოს ბაღდათის მუნიციპალიტეტში ბერიეთობა აღნიშნეს.

ბაღდათის მუნიციპალიტეტის სოფელ კაკასხიდიდან დაახლოებით 3 კილომეტრში, ხვალასკურის მთის მიდამოებში მდებარეობს წმინდა ელია წინასწარმეტყველის სახელობის ბერიეთის დარბაზული ტიპის ტაძრის ნანგრევები, რომელიც კირითა და ქვით არის ნაშენები, თარიღდება დაახლოებით VII-VIII საუკუნეებით. ამ წმინდა ადგილას რამდენიმე ათეული წლის წინათ სოფელი მდებარეობდა, მას ბერიეთი რქმევია და ზეკრის ხეობისკენ მიმავალ გზასთან ახლოს ერთ–ერთი დასახლებული პუნქტი იყო. ის საკმაოდ დიდი და ჩამოყალიბებული სოფელი იქნებოდა, რაც დღევანდელი ნანგრევებით ჩანს, ისინი თითქმის მიწასთანაა გასწორებული.

აქ ძირითადი გავრცელებული გვარები ყოფილა: ბერიძე, გორგოძე და კოხოძე. ყოველი წლის 2 აგვისტოს ამ გვარის წამომადგენლების უმრავლესობა საგვარეულო წმინდა ადგილის მოსალოცად ზღვის დონიდან 800 მეტრზე ადის და რელიგიურ დღესასწაულს აღნიშნავს. მიმდინარე წელს ბერიეთამდე მისასვლელი საავტომობილო გზა საქართველოს რაგბისტთა ეროვნული ნაკრების წევრის, მამუკა გორგოძის ფინანსური მხარდაჭერით შეკეთდა.

ბერიეთობის ტრადიციულ დღესასწაულს ადგილობრივი მუნიციპალიტეტის წარმომადგენლები, საკრებულოს წევრები დაესწრნენ, ასევე – ბაღდათის მუნიციპალიტეტის საინფორმაციო, ეთნოკულტურული და ტურიზმის განვითარების ფონდის დირექტორი – ნინო კვირიკაძე, ამერიკელი მოხალისე „მშვიდობის კორპუსი“-დან რაიან ჰასკელი. ტურიზმისა და კურორტების განვითარების ცენტრის მენეჯერი – გოჩა ხორავა, ელია წინასწარმეტყველის სახელობის ბერიეთის მონასტრის წინამძღვარი – მამა ეფრემი, გეოგრაფიის აკადემური დოქტორი გიორგი დვალაშვილი.

ბერიეთის ტაძრის მოსალოცად მისულ ჯგუფს მეგზურობა გაუწია ივანე ჯავახიშვილის სახელობის თბილისის სახელმწიფო უნივერსიტეტის ისტორიის მუზეუმის მეცნიერ თანამშრომელმა, ისტორიის დოქტორმა, ბაღდათის მუნიციპალიტეტის ისტორიული ძეგლების გადარჩენის საორგანიზაციო ჯგუფის ხელმძღვანელმა ალექსანდრე მარუაშვილმა.